Semo tuti uguali
Questo articolo uscì per la prima volta in lingua Veneta e in lingua Inglese
per il Centre Maurits Coppieters nel 2017, con il titolo di:
FEMINISM ON THE PERIPHERIES OF EUROPE
AN INCLUSIVE AND INTERSECTIONAL YOUTH APPROACH
L’eguajansa de zènare la xe in obligo moral e sosial. Drìo cuanto el dize UNFPA, la pol èsar definìa cofà “el conpagno godimento de done e òmeni de beni, oportunità, resorse e corisponsion”. Promovarlo e laorar par la só realizasion l’è fondamentale inte la nostra sosietà del 21° segolo.
Anpò, sibèn che i xe stà fati sforsi da governi e sosietà sivile, el par ciaro che no s’a rivà a l’eguajansa de zènare, né inte l’Europa né inte’l mondo in zenaral. Se se vol vénsar sta bataja contro la dezeguajansa, se ga da atuar asion polìteghe, econòmeghe e culturai par la valorizasion de la dona e del so rolo inte la sosietà. Sto artigolo el discorarà de st’ultimo aspeto de la lota contra la dezeguajansa de zènare, fermàndose in partigolar sora la situasion del Vèneto. Volemo menar el letor conosar la situasion d’ancó de i deriti de la dona in Vèneto e darghe na prospetiva istòrega de sta cuestion. De pì, sercaremo de mostrar come la conprension de la istòria vèneta, co ezenpi istòreghi, la podarìa judar a sagomar el rajonamento sora la dezeguajansa de zènare. Par serar, sto artìgolo el sostegnarà che insegnar l’istoria local, de la dona, inte le scole la pol èsar na maniera fondamentale par darghe susta a la nostra càuza.
El Veneto de ancò
Ancò, par l’egujansa de zènare, el livelo del Veneto el xe bastansa baso. El Veneto sèita èsar soto el nivelo zenarale itaian, che za no el xe un de i pì alti in Europa e inte’l mondo. Defati, l’Itaia la xe inte le ùlteme pozision inte’l “Gender Equality Index” del 2015 publegà da l’istituto europeo par la dezeguajansa de zènare.
L’Itaia la xe al de soto del livel medio de la UE par ocupasion a tenpo pien e durada de la vida de laoro de le done; infinaménte staltre le xe anca un fiantin pì a riscio de poartà. Par sti mestieri anca i omeni i se cata doso al livel Europeo, ma manco de le done. I dai i fa oncora pì inpresion co se vaga a vedar el numaro de femene ministre, rento al parlamento o ai conseji rejonai, rento a le diresion de le dite o de le banche indò ghè asè manco done che intel rèsto d’Europa, co vénse el numaro dei i’omeni el xe pì alto dal bon. Par el “Global Gender Gap”, inte el 2015 l’Itaia la xe a’l 41ezimo posto so 145 paesi, dato che el xe influensà sora de tuto da la basa partisi- pasion politega de le done e anca da la granda difarensa de paga.
L’Educasion
Ghe da réndarse conto, vardando i dati spesìfeghi par el Vèneto, de l’inportansa de l’educasion come mezo asè inportante par suparar la dezeguajansa de zènare. Inte’l Vèneto el xe laureà el 21,7% de le done da i 30 a i 35 ani contra el 16,6% dei omeni d’età conpagna. L’è intaresante ligar el dato relativo al livelo d’istrusion a cuelo de l’ocupasion: la difarensa la crese al reduzarse del livelo d’educasion.
Se la difarensa la par picenina fra i laureài, el livelo d’ocupasion de le diplomàe l’è el 78% del totale dei diplomai òmeni e el se sbasa al 63%, vardando el diploma de scola media inferior e al 26% par chei che i ga finìo la scola elementar.
El Laoro
A vardar la dezeguajansa de zénare so’l posto de laoro, altri bagoli i vien fora. Segondo el raporto su ocupasion de masci e fémene in Vèneto, publegà inte’l 2015, le done che laora in Vèneto le xe de pì (54%) de la media itaiana (47%).
Resta, isteso, dezliveli de zènare, sia vardando la segregasion orizontale (le done le laora piasè in setori considerai femenili, cofà sanità, educasion,lavori sosiali ma anca ofici o boteghe) sia vardando la segregasion verticàl, par esempio le xe ancora poche le done in pozision dirigensiai inte le dite). A pezar ghe anca el destaco salariàl: inte’l cazo de dependenti a tenpo pien la difarensa media (dependente mascio – fémena) l’è darente ai 140€, e la crese man in man che la crese l’età del dependente; pa’i laureài el destaco el pole rivar anca a 350€.
Ghe da considarar anca che, se l’è pur vera che la parsentual de le done che laora in Vèneto la xe alta, par solito i’e le done stese che le asèta contrati de laoro atìpeghi o part-time. Condision, st’altra, pì comùn chive (34,2%) che inte’l resto de la penizola (31,9%) e che speso la xe ligà al bezogno de arlevar i fioli o tendar i parenti che no i xe autosufisienti (inte’l 58% de le volte) cuando i servisi asistensiali i vien considaradi masa cari o mia boni.
Anpò, a vardar l’istoria, el Veneto el ga conseguìo grandi risultai pa’i deriti de le done. Tacando co na testimoniansa su le done rento la sosietà vèneta avan dei Romani, sto artìgolo el se fermarà a discorar de do figure istòreghe da la sosietà vèneta del 17esimo segolo. Do sojeti, ancó dezmentegài, che ga lasà un segno inte l’istoria dei deriti de le done inte’l Veneto e inte l’Europa.
Vèneto e deriti de le done: Prospetiva Istòrega
Come i ne fa conta Herring & Lomas le done le ga zugà un rólo asè inportante drento la sosietà vèneta pre-romana (venètega), come xe evidensià dal gran nùmaro de iconografìe venèteghe in dove le vien raprezentade, e che, come l’argomenta Lomas, lasa inténdar l’inportansa de l’identità femenil in chela sosietà. De pì, ste iconografìe le làsa intendar na conesion tra l’identità de la dona e l’alfabetizasion. L’è anca vera parò che l’arte la s’a senpre intaresà a le fameje aristocrateghe, donca se pol limitar l’anàlizi sol a l’alta sosietà. Major reserca acadèmega so sto argomento la podaria revelar el vero rolo del le done de tute le clase sosial, ma anca come le done le sia stà poco o mal raprezentade.
Parlarémo de do pioniere che le ga canbià l’istoria e le xe stà motor par i deriti de la dona in Vèneto cusì cofà in Europa, siben dezmenteghè al dì de ancó. La prima inportante figura istòrega l’e Elena Lucresia Corner Piscopia. Nasesta Venesia inte’l 1648, l’e conosùa èsar la prima dona a otègnar el grado de dotor inte’l mondo.
Elena Cornaro Piscopia
Fiola de na fameja patrisia Vèneta, la ga conpletà i so studi al Studio de Padoa, rivando al dotorà in filozofìa inte’l 1678. Par confronto, la prima dona a laurearse a Oxford la xe stada molti sècoli a drìo, inte’l 1920.
El dotorà in filozofìa che ela la ga otegnùo l’e prova de la só pasion e inteligensa. Se conta che la parlase sie lengue pulito, che la sonàse asè ben, in partigolar el caocenbalo, el claicordo e l’arpa e che la fuse conosidora de matemàtega, astronomìa e teologìa via che la filosofìa.
Elena Cassandra Tarabotti
Dopo èsarse laureà, la ga refudà na serie de matrimoni conbinài, par dedicar la só vita studiar e tendar i pitochi, partesipando anca inte i debatidi co i só coleghi, incontrài inte i so viazi par l’Europa. La xe stà na vera ispirasion, inte n’epoca che no la dazea a le done oportunità de studiar, de viazar sensa el marìo o un famejar omo, o tor parte a la vita pùblega.
La segonda figura istòrega la xe Elena Cassandra Tarabotti. Na filosofa politega, scritora e monega che la ga vivesto a Venesia inte la prima metà del XVII segolo. La novità del so pensier de fa na teorega sveja e influente de la condision de la dona e na proto-femenista del XVIIesimo segolo.
La Tarabotti la ga vù da sormontàr i scoji a la partecipasion leteraria che al tenpo tute le done scritore le gavea da frontar. Ancabén el no poder otignìr un educasion formal, ela la ga scrivesto un total de 6 libri. Un el jera ciamà La Tirannia Paterna, indo la critichea el sistema conventual indóe le butele no le vegnea educade, no le vegnea respetade e jera lasà a quelo che ela avea nominà L’inferno Monacale. Ela la rognea che sforsar le butele a entrar in convento la fuse na sorta de violensa operà dai pari su le so fiole.
Rento i so scriti ela la denonsia la tradision de far tor i voti a forsa a le moneghe, come i’avea fato anca con ela, e la urta in maniera asè moderna par n’eguajansa sosial, econòmega e politega fra l’omo e la dona.17 In L’Anti- satira (1644), ela la smatea la bòta dei masci e la deneghea l’idéa che le femene le fuse manco rasionai dei omeni. I so testi jera ciaramente inspirà a la so esperiensa personal e la le doperea par menar vanti la so bataja par l’emansipasion de la dona.
In partigolar la credea inte l’inportansa de la istrusion come n’instrumento par l’emansipasion, del posto de laoro par l’indipendensa economega e la conbatea par na partisipasion asé pì granda de le done inte la vida politega e de la relizon, evidensiando l’inportansa de l’autodeterminasion de le done.
Chel che la ga scrito xe n’esenpio unico de scriti femenisti del so segolo. De fato “na rivendicasion de’ diriti de le done” de Mary Wollstonecraft, un de i primi e pì conosui scriti de filosofia femenista, el vegnarà scrivesto intel 1792, pasà scuazi 150 ani da la morte de Elena Cassandra Tarabotti.
Chel che’l xe inportante no desmentegar, el xe che, cofá la rajonea Margaret Walters,19 “algúne de le prime done europee a tor na pozision par se stese e pa’l so seso, i lo ga fato rento na realtà e inte na maniera relijoza.” Par la nostra vizion segolar, el podaria esar duro el “conosar davero el so corajo, o intendar i eféti, o el rimàrco, de la so desfida al status quo”.
La memoria
Na ‘olta presentà ste do inportanti figure istoreghe, gavemo da recordarse che i’è mezo dezmenteghè sia inte la sosietà che inte l’academia. El sol gàte a la memoria de Elena Cornaro el xe na statua bastansa sconta a Padoa e anca se l’atension par Elena Cassandra Tarabotti la xe cresua intel anbito academico inte st’ultimi ani, se pol dir che ste do figure le xe gnorae inte la cosiensa storega e rento el discorar publego in Veneto.
Sta custion la pol esar inputà avan de tuto al fato che ste storie le xe de raro contà ai scolari. E ciò par i programi scolasteghi inbachetà itaiani, che no làsa che l’istoria dei Veneti la vegna insegnà ‘nte le scole, e a la politega rejonal veneta che no l’è bona de portar vanti l’istoria e l’identità veneta. E la, la meza mancansa de l’insegnamento de l’istoria veneta inte le scole la ga zugà un rolo fondamental inte l’oblio academico e zeneral de ste do figure e de i valori che le reprezenta.
Come le ga sotolinià le femeniste de la segonda generasion, l’istoria la xe stà scrivesta scuazi senpre da i òmeni e reguardo l’atività de i òmeni, cofà guere e polìtega, mentre el contribudo de le done l’è sta senpre sconto e, donca, poco tratà. In verità, l’insegnamento de la vita e de le visende de done come la Tarabotti podarìa far crésar la cosiensa de i Vèneti so le fadighe che le done ga cognesto afrontar; zenarar major conprension par la forsa revolusionaria e ‘l spìrito de tante done inte l’istoria, apresar i só contribudi jutando dar na forma al dibàtido d’ancó su l’eguajansa de zènare, co ezenpi tolti propi da l’istoria de i nostri teritori.
Educasion de l’istoria local: un strumento par el femenizmo
No ghe xe dubio che l’educasion la gavaria da esar la prima de le solusion a la dezuguajansa de zénar. El xe stà demostrà da academeghi cofà Shelley Correll20 che i stereotipi de zénar i influensa le sielte de cariera e parchè i omeni i’a dominà in laori ligà a matematega e siensia. El xe anca ciaro che sti stereotipi i sagoma le relasioni fra omeni e done. Par chela l’è fondamantal insegnarghe ai fioi la realtà de la condision de la dona contandoghe le esperiens e, i roli, e i fati ligà a le done in tuta l’istoria par destrigar sti stereotipi.
In particolar, una de le maniere par conbatar la dezuguajansa de zénar la pol vegnar da la solusion al problema de anonimità che gavemo presentà chi sora. De fato l’insegnamento de l’istoria de ste do figure istoriche el pol far cresar l’atension dei Veneti su sta custion e judar a sagomar el dibatito sora la dezuguajansa de zénar, catando dei ezenpi de come se costumava ‘nte l’istoria de i so teritori. Come el dise Slater,21 canbiar i curicula d’istoria tacando dal prinsipio de la località el pol esar na gran bona “introdusion ai bagoli sosiali e economeghi ‘nte i so contesti Europei e mondiai”. El par ciaro che la nostra istoria, piena de bei esenpi de done emansipè la pol esar n’instrumento asé utile par sormontar le grandi sfide che ghemo inànsi par rivar a l’uguajansa de zénar.
A savemo ben che insegnar l’istoria veneta no’l xe mia bastansa. El ne par istéso, che metar inte la scola dei corsi dedicai a l’istoria local, consen- trandose su l’inportansa e sui rezultadi de ste done venete corajoze, pol judarne a darghe susta a la discusión pùblega e a la cosiensa istorega par eser anca pi consapevoi de le dezuguaglianse de zénar.